ਕਣਕ ਦੇ ਤਸਦੀਕਸ਼ੁਦਾ ਬੀਜਾਂ ਨੂੰ ਸਬਸਿਡੀ ‘ਤੇ ਲੈਣ ਲਈ ਕਿਸਾਨ ਹੁਣ 31 ਅਕਤੂਬਰ ਤੱਕ ਕਰ ਸਕਦੇ ਹਨ ਅਪਲਾਈ

ਮੋਗਾ, 25 ਅਕਤੂਬਰ ( Charanjit Singh ) ਪੰਜਾਬ ਸਰਕਾਰ ਦੇ ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਵਿਭਾਗ ਵੱਲੋਂ ਕਣਕ ਦੇ ਤਸਦੀਕਸ਼ੁਦਾ ਬੀਜਾਂ ਨੂੰ ਸਬਸਿਡੀ ਤੇ ਦੇਣ ਲਈ ਇੱਕ ਪਾਲਿਸੀ ਜਾਰੀ ਕੀਤੀ ਹੈ।

ਇਸ ਬਾਰੇ ਵਧੇਰੇ ਜਾਣਕਾਰੀ ਦਿੰਦਿਆਂ ਮੁੱਖ ਖੇਤੀਬਾੜੀ ਅਫ਼ਸਰ ਮੋਗਾ ਡਾ. ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਕਿਸਾਨ ਆਨਲਾਈਨ ਪੋਰਟਲ ਉੱਤੇ ਆਈ.ਡੀ. ਬਣਾਕੇ ਕਣਕ ਦੇ ਬੀਜ ਦੀ ਮੰਗ ਭਰ ਸਕਦੇ ਹਨ। ਕਿਸਾਨ ਆਪਣੀਆਂ ਅਰਜ਼ੀਆਂ ਆਨਲਾਈਨ ਮਿਤੀ 31 ਅਕਤੂਬਰ 2021 ਤੱਕ ਭਰ ਸਕਦੇ ਹਨ । ਉਨ੍ਹਾਂ ਕਿਹਾ ਕਿ ਕਿਸਾਨਾਂ ਦੀਆਂ ਅਧੂਰੀਆਂ ਅਰਜ਼ੀਆਂ ਤੇ ਵਿਚਾਰ ਨਹੀਂ ਕੀਤਾ ਜਾਵੇਗਾ ।

ਕਿਸਾਨ ਰਜਿਸਟਰਡ ਹੋਣ ਸਮੇਂ ਆਪਣਾ ਪੂਰਾ ਵੇਰਵਾ ਸਮੇਤ ਬੈਂਕ ਅਕਾਉਂਟ ਨੰਬਰ ਅਤੇ ਆਈ.ਐਫ.ਐਸ.ਸੀ. ਕੋਡ ਵੀ ਭਰੇਗਾ। ਹਰੇਕ ਕਿਸਾਨ ਨੂੰ ਵੱਧ ਤੋਂ ਵੱਧ 2 ਕੁਇੰਟਲ ਬੀਜ (5 ਏਕੜ ਲਈ) ਦਿੱਤਾ ਜਾਵੇਗਾ। ਵਿਭਾਗ ਵੱਲੋਂ ਅਰਜੀਆਂ ਲੈਣ ਉਪਰੰਤ ਸੈਂਕਸ਼ਨ ਪੱਤਰ ਆਨਲਾਈਨ ਜਾਰੀ ਕੀਤਾ ਜਾਵੇਗਾ ਜਿਸਦਾ ਮੈਸਜ਼ ਕਿਸਾਨ ਦੇ ਮੋਬਾਇਲ ਨੰਬਰ ਤੇ ਆ ਜਾਵੇਗਾ। ਕਿਸਾਨ ਆਪਣੀ-ਆਪਣੀ ਆਈ.ਡੀ. ਤੋਂ ਇਹ ਸੈਂਕਸ਼ਨ ਪੱਤਰ ਡਾਊਨਲੋਡ ਕਰ ਸਕਣਗੇ।

ਜਿਸ ਵੀ ਬੀਜ ਪ੍ਰੋਡਿਊਸਰ ਨੇ ਆਪਣਾ ਸਰਟੀਫਾਈਡ ਬੀਜ ਕਿਸਾਨਾਂ ਨੂੰ ਸਬਸਿਡੀ ਤੇ ਦੇਣਾ ਹੈ ਉਹ ਆਪ ਆਪਣੇ-ਆਪਣੇ ਰਜਿਸਟਰਡ ਡੀਲਰ, ਜਿਨ੍ਹਾਂ ਰਾਹੀਂ ਇਹ ਬੀਜ ਕਿਸਾਨਾਂ ਨੂੰ ਸਬਸਿਡੀ ‘ਤੇ ਦੇਣਾ ਹੈ ਨੂੰ ਵੀ ਪੋਰਟਲ ਤੇ ਆਪ ਰਜਿਸਟਰਡ ਕਰਨਗੇ ਅਤੇ ਹਰੇਕ ਪ੍ਰੋਡਿਊਸਰ ਅਤੇ ਡੀਲਰ ਦੀ ਆਪਣੀ-ਆਪਣੀ ਆਈ.ਡੀ. ਹੋਵੇਗੀ। ਹਰੇਕ ਪ੍ਰੋਡਿਊਸਰ ਅਤੇ ਉਸਦੇ ਰਜਿਸਟਰਡ ਡੀਲਰ ਕੋਲ 30 ਨਵੰਬਰ, 2021 ਤੱਕ ਦੀ ਵੈਧਤਾ ਵਾਲਾ ਬੀਜ਼ ਲਾਇਸੰਸ ਹੋਣਾ ਜਰੂਰੀ ਹੈ।

ਕਿਸਾਨ, ਪੋਰਟਲ ‘ਤੇ ਰਜਿਸਟਰਡ ਹੋਏ ਸਰਕਾਰੀ/ਸਹਿਕਾਰੀ/ਪ੍ਰਾਈਵੇਟ ਪ੍ਰੋਡਿਊਸਰ ਜਾਂ ਡੀਲਰ, ਕਿਸੇ ਤੋਂ ਵੀ ਸਰਟੀਫਾਈਡ ਕਣਕ ਦਾ ਬੀਜ ਖ੍ਰੀਦ ਸਕਦਾ ਹੈ।ਇਹ ਬੀਜ ਪੰਜਾਬ ਰਾਜ ਬੀਜ ਪ੍ਰਮਾਣਿਤ ਸੰਸਥਾ ਤੋਂ ਸਰਟੀਫਾਈਡ ਹੋਣਾ ਜਰੂਰੀ ਹੈ।ਕਣਕ ਦਾ ਬੀਜ ਤਕਸੀਮ ਕਰਨ ਲਈ ਅਨੁਸੂਚਿਤ ਜਾਤੀ ਨੂੰ ਪਹਿਲ ਦਿੱਤੀ ਜਾਵੇਗੀ।ਇਸ ਤੋਂ ਬਾਅਦ ਮਾਰਜਨਲ ਕਿਸਾਨ ਅਤੇ ਫਿਰ ਛੋਟੇ ਕਿਸਾਨਾਂ ਨੂੰ ਪਹਿਲ ਦਿੱਤੀ ਜਾਵੇਗੀ। ਕਿਸਾਨ ਵੱਲੋਂ ਖ੍ਰੀਦੇ ਬੀਜ ਦੀ ਜਾਣਕਾਰੀ, ਬਿਲ ਅਤੇ ਟੈਗ ਪੋਰਟਲ ਤੇ ਡੀਲਰ ਵਲੋਂ ਅਪਲੋਡ ਕੀਤਾ ਜਾਵੇਗਾ। ਮੁੱਖ ਖੇਤੀਬਾੜੀ ਅਫ਼ਸਰ ਦੀ ਵੈਰੀਫਿਕੇਸ਼ਨ ਉਪਰੰਤ ਸਬਸਿਡੀ ਸਿੱਧੀ ਕਿਸਾਨ ਦੇ ਬੈਂਕ ਅਕਾਊਂਟ ਵਿੱਚ ਪਾ ਦਿੱਤੀ ਜਾਵੇਗੀ।

ਉਨ੍ਹਾਂ ਅੱਗੇ ਦੱਸਿਆ ਕਿ ਇਹ ਸਬਸਿਡੀ ਕਿਸਾਨ ਦੇ ਬੈਂਕ ਖਾਤੇ ਵਿੱਚ ਸਿੱਧੀ ਡੀ.ਬੀ.ਟੀ. ਰਾਂਹੀ ਟ੍ਰਾਂਸਫਰ ਕੀਤੀ ਜਾਵੇਗੀ ਅਤੇ ਜੇਕਰ ਕਿਸਾਨ ਆਪਣੀ ਲਿਖਤੀ ਸਹਿਮਤੀ ਦੇਵੇਗਾ ਕਿ ਮੇਰੀ ਬਣਦੀ ਸਬਸਿਡੀ ਪ੍ਰੋਡਿਊਸਰ/ਡੀਲਰ ਦੇ ਬੈਂਕ ਖਾਤੇ ਵਿਚ ਟ੍ਰਾਂਸਫਰ ਹੋ ਜਾਵੇ ਤਾਂ ਉਹ ਆਪਣੀ ਸਹਿਮਤੀ ਪ੍ਰੋਡਿਊਸਰ/ ਡੀਲਰ ਨੂੰ ਦੇ ਕੇ ਆਪਣਾ ਬੀਜ ਸਬਸਿਡੀ ਕੱਟ ਕੇ ਬਾਕੀ ਰਕਮ ਤੇ ਖ੍ਰੀਦ ਸਕਦਾ ਹੈ।

ਕਣਕ ਦੇ ਤਸਦੀਕਸ਼ੁਦਾ ਬੀਜ ਦੀ ਸਬਸਿਡੀ ਕੇਵਲ ਭਾਰਤ ਸਰਕਾਰ ਵੱਲੋਂ ਪੰਜਾਬ ਲਈ ਨੋਟੀਫਾਈ ਅਤੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੀਆਂ ਸਿਫਾਰਿਸ਼ ਕੀਤੀਆਂ ਕਿਸਮਾਂ ਜਿਨ੍ਹਾਂ ਦੀ ਸਰਟੀਫਿਕੇਸ਼ਨ ਸਿਰਫ ਪੰਜਾਬ ਵਿੱਚ ਹੀ ਹੋਈ ਹੋਵੇ, ਨੂੰ ਹੀ ਇਸ ਸਕੀਮ ਵਿੱਚ ਵਿਚਾਰਿਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਬੀਜਾਂ ਵਿੱਚ ਉੱਨਤ ਪੀ.ਬੀ. ਡਬਲਯੂ. 343, ਉਨਤ ਪੀ.ਬੀ. ਡਬਲਯੂ. 550, ਪੀ ਬੀ ਡਬਲਯੂ 1 ਜ਼ਿੰਕ, ਪੀ ਬੀ ਡਬਲਯੂ 725, ਪੀ ਬੀ ਡਬਲਯੂ 677, ਐਚ ਡੀ 3086, ਡਬਲਯੂ ਐਚ 1105,ਐਚ ਡੀ 2967,ਪੀ ਬੀ ਡਬਲਯੂ 621, ਡਬਲਯੂ ਐਚ ਡੀ 943, ਡੀ.ਬੀ.ਡਬਲਯੂ 187, ਡੀ.ਬੀ.ਡਬਲਯੂ 222, ਐਚ.ਡੀ. 3226, ਪਿਛੇਤੀ ਬਿਜਾਈ ਲਈ ਪੀ.ਬੀ. ਡਬਲਯੂ 752, ਪੀ ਬੀ ਡਬਲਯੂ 658 ਦੀ ਅਤੇ ਬਰਾਨੀ ਹਾਲਤਾਂ ਲਈ ਪੀ ਬੀ ਡਬਲਯੂ 660 ਸ਼ਾਮਿਲ ਹਨ।

ਡਾ. ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਐਚ ਡੀ 2967 ਦਾ ਬੀਜ ਨੀਮ ਪਹਾੜੀਆਂ ਇਲਾਕਿਆਂ ਜਿਵੇਂ ਕਿ ਮੋਹਾਲੀ, ਰੋਪੜ, ਨਵਾਂ ਸ਼ਹਿਰ, ਗੁਰਦਾਸਪੁਰ, ਹੁਸ਼ਿਆਰਪੁਰ ਅਤੇ ਪਠਾਨਕੋਟ ਵਿੱਚ ਸਬਸਿਡੀ ਤੇ ਨਹੀਂ ਦਿੱਤਾ ਜਾਵੇਗਾ ਕਿਉਂਕਿ ਇਸ ਕਿਸਮ ਨੂੰ ਪੀਲੀ ਕੁੰਗੀ ਦਾ ਰੋਗ ਜਿਆਦਾ ਲੱਗਦਾ ਹੈ। ਇਨ੍ਹਾਂ ਕਿਸਮਾਂ ਤੇ ਬੀਜ ਦੀ ਕੀਮਤ ਦਾ 50 ਫੀਸਦੀ ਜਾਂ ਵੱਧ ਤੋਂ ਵੱਧ 1000/- ਰੁਪਏ ਪ੍ਰਤੀ ਕੁਇੰਟਲ ਸਬਸਿਡੀ ਦਿੱਤੀ ਜਾਵੇਗੀ ।

ਉਨ੍ਹਾਂ ਦੱਸਿਆ ਕਿ ਜ਼ਿਲ੍ਹਾ ਮੋਗਾ ਸਬੰਧਤ ਕਿਸਾਨ ਵਧੇਰੇ ਜਾਣਕਾਰੀ ਲਈ ਸੰਪਰਕ ਨੰਬਰ 9878903224 ਤੇ ਰਾਬਤਾ ਕਾਇਮ ਕਰ ਸਕਦੇ ਹਨ।